धनकुटा प्रेस सम्वाददाता

धनकुटा/धनकुटाको राजारानीमा जिल्लाकै प्रतिष्ठित रारा गोल्डकप फुटबल प्रतियोगिता आयोजना हुने भएको छ । सात लाख रुपैयाँ पुरस्कार राशिको प्रतियोगिता धनकुटाको रारा फुटबल क्लब चैविसेले आयोजना गर्न लागेको हो । आउँदो वैशाख २९ गतेबाट जेठ ३ गतेसम्म सञ्चालन हुने १२ औं संस्करणको रारा गोल्डकप फुटबल प्रतियोगितामा ८ टिमले प्रतिस्पर्धा गर्नेछ्न् । चौविसे गाउँपालिका वडा नं.६ स्थित् राजारानीमा रहेको स्थानीय पुण्य माविको खेल मैदानमा आयोजना हुने प्रतियोगितामा डिफेन्डिङ च्याम्पियन सहलेस फुटबल क्लब सिरहा, चर्च ब्वाइज युनाइटेड, बागमती युथ क्लब सर्लाही, गोल्डेन स्टार सुनसरी, एलएक्स सिटी मोरङ, बिर्तामोड युनाइटेड क्लव र डाँडाबजार फुटबल क्लबले प्रतिस्पर्धा गर्ने रारा फुटवल क्लवका अध्यक्ष मणी चेम्जोङ्गले बताए । प्रतियोगिताको विजयी टिमले ७ लाख रुपैयाँ नगद, ट्रफी र प्रमाण पत्र प्राप्त गर्नेछन् । यस्तै, उपविजेता टिमले ३ लाख रुपैयाँ नगद, ट्रफी र प्रमाणपत्र पाउनेछ । यसैगरि, प्रत्येक खेलमा विधागत र म्यान अफ दी म्याचलाई समेत पुरस्कारको व्यवस्था गरिएको रारा फुटबल क्लबका अध्यक्ष मणि चेम्जोङले जानकारी दिए । प्रतियोगिता सञ्चालनका लागि ४२ लाख रुपैयाँ खर्च लाग्ने आयोजित पत्रकार सम्मेलनमा जानकारी दिइएको छ । ।रारा फुटवल क्लव चौविसे राजारानीका अध्यक्ष मणी चेम्जोङ्गको अध्यक्षतामा सम्पन्न १२ औं संस्करणको रारा रनिङ्ग गोल्डकप फुटवल प्रतियोगिताको वारेमा जानकारी गराउन आयोजना गरिएको पत्रकार सम्मेलनमा नेपाल सरकार पूर्वमन्त्रि रकम चेम्जोङ्ग, चौविसे गाउँपालिकाका अध्यक्ष राजकुमार चेम्जोङ्ग, चौविसे गाउँपालिका वडा नं.६ का वडाध्यक्ष आशिष चेम्जोङ्ग, समाजसेवी दिवा चेम्जोङ्ग, राष्ट्रिय खेलाडी वुद्ध चेम्जोङ्ग, नेपाल पत्रकार महासंघ धनकुटा शाखाका अध्यक्ष विदुर खवास लगायतको उपस्थिति रहेको थियो । त्यसैगरी अग्नी वशुन्धरा प्रतिष्ठानका संरक्षकहरु देवीरत्न चेम्जोङ्ग र मणरत्न चेम्जोङ्गको पनि सो अवसरमा उपस्थिति रहेको थियो । 

• dhankutapress