धनकुटा प्रेस सम्वाददाता
धनकुटा/हिन्दू स्वयंसेवक संघ, नेपाल कोशी सम्भाग धनकुटाको आयोजनामा सञ्चालन गरिएको प्रारम्भिक वर्ग २०८३ सम्पन्न भएको छ ।
धनकुटाको मूलघाटस्थित विश्रान्ति मन्दिरमा असोज २३ देखि २५ गतेसम्म सञ्चालन भएको वर्गमा १३ वर्षभन्दा माथिका विभिन्न विद्यालयका ६० जना विद्यार्थीहरु सहभागी भएका थिए । नेपाल प्रहरीका पूर्व अतिरिक्त महानिरीक्षक (एआईजी) कल्याणकुमार तिम्सिनाको प्रमुख आतिथ्यमा सम्पन्न कार्यक्रममा नेपाल पत्रकार महासंघ धनकुटाका अध्यक्ष विदुर खवाससहित हिन्दू स्वयंसेवक संघका विभिन्न पदाधिकारीहरूको उपस्थिति रहेको थियो ।
हिन्दू स्वयंसेवक संघ धनकुटाका सह–सचिव भेषराज कटेलको अध्यक्षतामा सम्पन्न वर्गमा सहभागी विद्यार्थीहरुलाई अनुशासन, व्यक्तित्व विकास, सामाजिक उत्तरदायित्व तथा स्वयंसेवकीय भावनासम्बन्धी प्रशिक्षण दिइएको हिन्दू स्वयंसेवक संघ धनकुटाले जनाएको छ । 
तीन दिनसम्म सञ्चालन भएको प्रशिक्षणले विद्यार्थीहरुमा सामाजिक सद्भाव, नैतिक मूल्य, नेतृत्व क्षमता र सेवाभाव विकास गर्न सहयोग पुग्ने आयोजकको अपेक्षा छ । कार्यक्रममा सहभागी विद्यार्थीहरुलाई समाजप्रति जिम्मेवार बनाउँदै सकारात्मक गतिविधिमा प्रेरित गर्ने उद्देश्य राखिएको हिन्दू स्वयंसेवक संघ धनकुटाका सह–सचिव कटेलले बताए ।
- dhankutapress
