धनकुटा प्रेस सम्वाददाता
धनकुटा/धनकुटाको महालक्ष्मी नगरपालिका वडा नं.–४ चनुवामा विद्युत् सर्ट भई आगलागी हुँदा एक घरसहित घरभित्र रहेका सामान जलेर नष्ट भएको छ ।
जिल्ला प्रहरी कार्यालय धनकुटाका अनुसार मंगलवार बिहान ९.१० बजेको समयमा योगेश अधिकारीको टिनको छानो र काठपात तथा टिनको बेराले बनेको एकतले कच्चि घरमा आगलागी भएको हो । आगलागीको जानकारी प्राप्त हुनासाथ प्रहरी चौकी चानुवाबाट खटिएको प्रहरी टोलीले स्थानीयवासीको सहयोगमा आगो नियन्त्रणमा लिएको थियो ।
आगलागीबाट घर, घरभित्र रहेका लत्ताकपडा, भाँडावर्तन, खाद्यान्न तथा सोही घरमा सञ्चालित कस्मेटिक पसलका विभिन्न सामान पूर्ण रूपमा जलेर नष्ट भएक छ । घटनाबाट करिब ५ लाख रुपैयाँ बराबरको क्षति भएको प्रहरीले जनाएको छ । आगलागीबाट कुनै मानवीय तथा चौपाया क्षति नभएको जिल्ला प्रहरी कार्यालय धनकुटाले जनाएको छ /
- dhankutapress
