धनकुटा प्रेस सम्वाददाता
धनकुटा/धनकुटाको साँगुरीगढी गाउँपालिका वडा नं.–६ भेडेटारमा दुर्घटनामा परेको स्कार्पियो गाडीबाट ३ सय ४१ किलो गाँजा बरामद भएको छ । सकारपियो दुर्घटना स्थलबाट शंकास्पद अवस्थामा भेटिएका एक जना यूवालाई प्रहरीले नियन्त्रणमा लिएको छ ।
जिल्ला प्रहरी कार्यालय धनकुटाका अनुसार मंगलवार राति करिब ११ः५५ बजे ढुंगेबाट भेडेटारतर्फ आउँदै गरेको बा.१३ च ६२७५ नम्बरको स्कार्पियो भेडेटारस्थित स्काईवाक नजिकै भित्री सडकबाट करिब १५ मिटर तल खसेर दुर्घटना भएको थियो । दुर्घटनाको सूचना पाएपछि इलाका प्रहरी कार्यालय भेडेटारबाट प्रहरी नायब निरीक्षक भीमबहादुर श्रेष्ठको कमाण्डमा टोली घटनास्थल पुगेको थियो । प्रहरीले गाडी चेकजाँच गर्दा बोरामा प्याक गरी राखिएको ३ सय ४१ किलो गाँजा बरामद गरेको हो ।
दुर्घटनाग्रस्त स्कार्पियो गाडीभित्र भने कोही फेला परेनन । घटनास्थल नजिकै शंकास्पद अवस्थामा रहेका मोरङको विराटनगर महानगरपालिका–९ घर भई हाल सुनसरी जिल्लाको धरान उपमहानगरपालिका–१० बस्ने वर्ष ३९ का अमित विश्वकर्मालाई प्रहरीले नियन्त्रणमा लिएको छ । बरामद गाँजा र स्कार्पियोसहित विश्वकर्मालाई जिल्ला प्रहरी कार्यालय धनकुटामा ल्याई घटनाबारे आवश्याक अनुसन्धान भइरहेको जिल्ला प्रहरी कार्यालय धनकुटाका प्रवक्ता प्रहरी नायव उपरिक्षक हेमन्त भण्डारीले जानकारी दिएका छन ।
- dhankutapress
