धनकुटा प्रेस अनलाईन पत्रिका सम्वाददाता
धनकुटा/आगामी कात्तिक १८ गते हुन गइरहेको निम्न माध्यमिक तह अध्यापन अनुमति–पत्र परिक्षालाई मध्यनजर गर्दै नेपाल विद्यार्थी संघ धनकुटा वहुमुखी क्याम्पस ईकाई समितिले तयारी (सहजीकरण) कक्षा सुरु गरेको छ ।
धनकुटा वहुमुखी क्याम्पसमा संचालन हुने सात दिने निःशुल्क तयारी कक्षाको उद्घाटन आइतवार एक कार्यक्रमका वीच नेपाली कांग्रेसका धनकुटा सभापति दिनेश राईले गरेका थिए । कार्यक्रममा वोल्दै कांग्रेस जिल्ला सभापति दिनेश राईले नेवि संघ क्याम्पस इकाइले संचालन गरेको तयारी कक्षाले परिक्षा दिन लागेको विद्यार्थीहरुलाई सहयोग पुग्ने बताए ।
तयारी कक्षाको प्रमुख प्रशिक्षक शिक्षा विकास निर्देशनालयका शाखा अधिकृत सन्तोष बराल रहेका छन् ।
तयारी कक्षा हरेक दिन विहान ७ देखि ८ बजेसम्म धनकुटा बहुमुखी क्याम्पसमा हुनेछ । कक्षा सुरु भएको पहिलो दिन १ सय भन्दा बढी विद्यार्थीको सहभागिता रहेको थियो । तयारी कक्षा संचालनको अवधि एक हप्ताको भए पनि त्यसलाई बढाएर १५ दिनको बनाइने नेवि संघ क्याम्पस इकाइका कार्यवाहक सभापति रन्जन कार्कीले बताए । उनका अनुसार तयारी कक्षामा सहभागि हुने शतिप्रतिशत विद्यार्थी पास हुने लक्ष्य राखिएको छ ।
उद्घाटन कार्यक्रममा नेपाली कांग्रेस महाधिवेशन प्रतिनिधि तथा पूर्व नेवि संघ सभापति खेम पौडेल, स्वतन्त्र विद्यार्थी यूनियन धनकुटा वहुमुखी क्याम्पसका सचिव सुवास खनाल लगायतले मन्तव्य राखेका थिए । कार्यक्रममा धनकुटा वहुमुखी क्याम्पसका निमित्त प्रमुख मानवहादुर भण्डारी, पूर्व सहायक क्याम्पस प्रमुख (शिक्षातर्फ) दिनेश अधिकारी लगायतको उपस्थिति रहेको थियो । उद्घाटन कार्यक्रमको सभापतित्व नेवि संघ क्याम्पस इकाइका कार्यवाहक सभापति रञ्जन कार्की र संचालन क्याम्पस इकाइ सहसचिव विरेन्द्र भण्डारीले गरेका थिए ।
- Dhankutapress