धनकुटा प्र्रेस सम्वाददाता
पञ्चमाया तामाङ
धनकुटा/धनकुटास्थित निजामती आवासीय विद्यालयको शैक्षिक गुणस्तर अभिवृद्धि तथा पूर्वाधार विकासका लागि प्रारम्भिक प्रतिवेदन सार्वजनिक गरिएको छ ।
विस्तृत परियोजना प्रतिवेदन तयार पार्ने उद्देश्यसहित सरोकारवालाहरूसँग छलफल गरिएको हो । कार्यक्रम शिक्षा विकास निर्देशनालय, कोशी प्रदेश धनकुटाको संयोजनमा र त्रिभुवन विश्वविद्यालयअन्तर्गत शिक्षा विकास तथा अनुसन्धान केन्द्र, काठमाडौंको आयोजना तथा प्राविधिक सहयोगमा शुक्रवार धनकुटामा सम्पन्न भएको हो ।
कार्यक्रममा विद्यालयको अध्ययनको उदेश्य, वीधि र प्रक्रिया, प्रतिवेदनको संरचनागत रुपरेखा, शैक्षिक अवस्था, भौतिक पूर्वाधार, मानव संसाधन, विद्यार्थीको सिकाइ उपलब्धि, समावेशीता, पहुँच र व्यवस्थापन लगायतका पक्षमा विस्तृत अध्ययन गरी तयार पारिएको प्रारम्भिक प्रतिवेदन त्रिभुवन विश्वविद्यालयका प्रा. डा. विनोद लुइटेल र प्रा डा कमलकुमार पौडेल प्रतिवेदन प्रस्तुत गरेका थिए ।
सो प्रतिवेदनले निजामती आवशिय विद्यालय धनकुटाको वर्तमान अवस्था मूल्यांकन गर्दै आवश्यक सुधारका क्षेत्र पहिचान गरेको छ । साथै, दीर्घकालीन मास्टर प्लान, दिर्घकालिन प्रशासनिक संरचना, विद्यालयको शैक्षिक कार्यक्रमको संरचना, भावी दिशा ः प्रक्षेपण, अनुमानित लागत, कार्यान्वयन रणनीति, प्राथमिकताका आधारमा परियोजनाहरूको अनुक्रम र आवश्यक सहयोग संयन्त्रहरू उल्लेख गरिएको छ ।
कार्यक्रममा स्थानीय सरकारका प्रमुख एवं उप प्रमुख र प्रतिनिधिहरु, विद्यालय व्यवस्थापन समितिका पदाधिकारी एवं सदस्यहरु, शिक्षक, अभिभावक, विद्यार्थी, अभिभावकहरु, शिक्षाविद् तथा अन्य सरोकारवालाहरूको उल्लेख्य उपस्थिति रहेको थियो । सहभागीहरूले प्रतिवेदनमा समावेश प्रस्तावहरूबारे महत्वपूर्ण सुझाव र धारणा व्यक्त गरेका थिए ।
छलफलका क्रममा विद्यालयको भौतिक संरचना सुधार, छात्रावास सुविधा विस्तार, प्रविधिमा आधारित शिक्षण, दक्ष जनशक्ति अभिवृद्धि, बालमैत्री वातावरण निर्माण र समुदाय सहभागिता वृद्धि गर्नुपर्ने विषयहरूमा विशेष जोड दिइएको थियो । कार्यक्रमका अन्त्यमा प्रस्तुत सुझाव र प्रतिक्रिया समेटेर प्रतिवेदनलाई अझ परिष्कृत बनाई अन्तिम प्रतिवेदन तयार पारिने र त्यसको आधारमा कार्यान्वयनका चरणमा अघि बढ्ने धनकुटाका प्रमुख जिल्ला अधिकारी टुबराज पोख्रेलले जानकारी दिए ।
- dhankutapress
