धनकुटा प्रेस अनलाईन खबर सम्वाददाता 

धनकुटा/अशोज २५ गते विहिवार धनकुटाको राजारानीबाट पक्राउ परेका तिनजना पहिचानवादी राजवन्दी विनाशर्त सोमवार रिहा नभएपछि मंगलवार देखी धनकुटा अनिश्चितकालिन वन्द घोषणा गरिएको छ ।

प्रदेश नं.१ पुनःनामांकन संयुक्त संघर्ष समिति जिल्ला समन्वय समिति धनकुटाले पहिचानवादी राजवन्दीहरुलाई स्थानिय प्रशासनले सोमवार रिहा नगरेपछि वाध्य भएर आन्दोलनको घोषणा गरिएको जिल्ला संयोजक संजय सन्तोषी राईले बताए । यस अघि जिल्ला प्रशासन कार्यालय धनकुटाका प्रमुख पून्यविक्रम पौडेलले अशोज–२५ गते राजारानीमा पक्राउ परेको पहिचानवादीहरुलाई सोमवार रिहा गर्ने प्रतिवद्धता जनाएका थिए । 

तर, सोमवार प्रजिअ पौडेलले पहिचानवादीहरुलाई नछोडेपछि वदलास्वरुप अनिश्चितकालिन धनकुटा वन्द घोषणा गरेको संघर्ष समितिका केन्द्रिय सचिवालय सदस्य कृष्ण चोङवाङले वताए । उनले भने–’पटक–पटक समन्वय सहकार्य गर्दागर्दै पनि धनकुटा प्रशासनले हेपाहा प्रवृति देखाएकाले मंगलवार देखी धनकुटा ठप्प पार्ने गरि आन्दोलन गर्नु परेको हो ।’ उनले हाम्रो साथीहरु विनाशर्त रिहा नभएसम्म धनकुटा वन्दको आन्दोलन जारी रहने वताए । 

जिल्ला प्शासन कार्यालयको मुलगेटमा आयोजित धनकुटा वन्द घोषणा कोणसभा पछि स्थानिय प्रशासन विरुद्ध चर्को नारावाजी गर्दै मंगलवार देखीको धनकुटा वन्द सफल पार्न धनकुटावासीलाई उनीहरुले अनुरोध गरेका थिए । उनीहरुले धनकुटा वजारको विभिन्न भागमा नारावाजी गर्दै स्थानिय मदनचोकमा पुगेर कोणसभा गरेका थिए ।   

• Dhankutapress