धनकुटा प्रेस सम्वाददाता

धनकुटा/धनकुटाको महालक्ष्मी नगरपालिका वडा नं.–५, स्कुलडाँडास्थित मध्यपहाडी लोकमार्गमा शव बोकेको एम्बुलेन्स दुर्घटना भएको छ । उम्दुलेन्स दुर्घटना हुँदा दुई जना एम्वुलेन्मा सवार घाइते भएका छन् ।

सनिवार राति करिब साँढे १२ः३० बजे विराटनगरबाट शव लिएर भोजपुरतर्फ जाँदै गरेको बा.प्र.०१.०२००२ झ ६१९० नम्बरको एम्बुलेन्स अनियन्त्रित भई सडकबाट खोल्सीमा खसेको हो । दुर्घटनामा एम्बुलेन्स चालक भोजपुरको रामप्रसाद राई गाउँपालिका नं.८ निवासी २१ वर्षीय शक्ति राई गम्भीर घाइते भएका छन् । उनको शरीरका विभिन्न भागमा चोट लागेको र उनी अचेत अवस्थामा रहेको जनाइएको छ । त्यस्तै, सोही गाउँपालिका वडा नं.–७ निवासी ४६ वर्षीय रामनन्द राईको कम्मरमा चोट लागेको छ । उनको अवस्था मध्यम खाल्को रहेको छ ।

दुर्घटनाको सूचना प्राप्त भएपछि प्रहरी चौकी लेगुवाबाट प्रहरी सहायक निरीक्षक गोविन्द दासको कमाण्डमा खटिएको प्रहरी टोलीले घटनास्थलमा पुगेर घाइतेहरूको उद्धार गरी उपचारका लागि जिल्ला अस्पताल धनकुटा ल्याइएको थियो । तर, थप उपचारका लागि धरानस्थित विपी कोइराला स्वास्थ्य विज्ञान प्रतिष्ठान लगिएको जिल्ला प्रहरी कार्यालय धनकुटाका प्रवक्ता डिएसपी हेमन्त भण्डारी क्षेत्रीले जानकारी दिए । एम्बुलेन्स भोजपुर जिल्लामा पर्ने रामप्रसाद राई गाउँपालिकाद्वारा सञ्चालित रहेको जनाईएको छ ।

• dhankutapress