पञ्चमाया तामाङ
धनकुटा/चौथो संस्करणको सहिद रामकृष्ण श्रेष्ठ स्मृति अन्तरपालिका महिला फुटबल प्रतियोगिताको उपाधि झापाको कन्काई नगरपालिकाले उचालेको छ ।
धनकुटाको तल्लो टुँडिखेलमा सम्पन्न प्रतियोगितामा कन्काई नगरपालिकाले २–१ गोल अन्तरले धनकुटा नगरपालिकालाई हराउँदै उपाधि चुमेको हो । घरेलु दर्शकको राम्रो साथ पाएको धनकुटा नगरपालिकाले खेलको १९ औँ मिनेटमा मनिता तामाङको गोलबाट लिएको अग्रता कायम राख्न नसक्दा पराजित भएको हो । खेलको दोस्रो हाफको पहिलो र नवौँ मिनेटमा कन्काइकी जेनिफर रानामगरले गोल गर्दै टीमलाई विजयी गराइन् ।
बुधबार सम्पन्न पहिलो सेमिफाइनल खेलमा छथर जोरपाटी गाउँपालिका धनकुटालाई ० का विरुद्ध ४ गोल अन्तरले हराउँदै धनकुटा फाइनलमा पुगेको हो । यस्तै बुधबार नै भएको दोस्रो सेमिफाइनलमा मोरङको मिक्लाजुङ गाउँपालिकालाई ० का विरुद्ध ५ गोल अन्तरले हराउँदै कन्काइ नगरपालिका फाइनलमा पुगेको थियो ।
उपाधि विजेता कन्काइ नगरपालिकाले नगद १ लाख रुपैयाँ तथा गोल्डकप हात पार्यो। उपविजेता बनेको धनकुटा नगरपालिकाले नगद ५० हजार रुपैयाँ र रनिङ कपमा चित्त बुझायो। यस्तै, प्रतियोगिताको सर्वोत्कृष्ट खेलाडी कन्काइकी जेनिफर रानामगर घोषित भइन्। उत्कृष्ट मिडफिल्ड धनकुटाकी तिर्थ लिम्बू, उत्कृष्ट फरवार्ड कन्काइकी समिक्षा मगर, उत्कृष्ट गोलकिपर कन्काइकी रञ्जु चौधरी र उत्कृष्ट कोच कन्काइका सन्तबहादुर राई घोषित भए । उनीहले नगद पुरस्कार हात पारे। खेलपछि आयोजित समारोहमा विजेता र उपविजेता टोली तथा विधागत उत्कृष्ट खेलाडीलाई संविधान सभा सदस्य मनोहर नारायण श्रेष्ठ, लिला सुब्बा, धनकुटाका प्रमुख जिल्ला अधिकारी पुण्यबिक्रम पौडेल लगायतले पुरस्कार र प्रमाणपत्र प्रदान गरे ।
धनकुटा नगरपालिका वडा नं. ७ निवासी रामकृष्ण श्रेष्ठको २०३० चैत ३ गते विराटनगरमा तत्कालीन राजा वीरेन्द्रमाथि बम प्रहारको घटनामा निधन भएको थियो । श्रेष्ठलाई २०७४ साल माघ ३ गते तत्कालीन सरकारले राष्ट्रिय सहिद घोषणा गरेको थियो। उनै सहिद श्रेष्ठको सम्झनामा गठित स्मृति प्रतिष्ठानले धनकुटामा सुरु महिला फुटबल प्रतियोगिता गर्दै आएको छ ।
- Dhankutapress
