धनकुटा प्रेस अनलाईन खवर सम्वाददाता 

धनकुटा/१६औं संस्करणको सहिद भीमनारायण गोल्डकप आगामी वैशाख २३ गतेदेखि धनकुटामा हुने भएको छ । 

सहिद भीमनारायण स्मृति प्रतिष्ठान धनकुटाले सोमबार पत्रकार सम्मेलन गरी १६ औँ संस्करण आगामी वैशाख २३ देखि २९ गतेसम्म सञ्चालन गर्ने जानकारी दिएको हो । 

जिल्ला सदरमुकाम धनकुटास्थित तल्लो टुँडिखेलमा हुने प्रतियोगितामा ए डिभिजन लिगका मचिन्द्र क्लब, न्युरोड टिम (एनआरटी), विभागिय टिम एपिएफसहित आयोजक धनकुटा, भोजपुर, सिराहा, सुनसरी, मोरङ, झापाको सहभागिता रहने आयोजक समितिका संयोजक शम्भु प्रधानले जानकारी दिए । 

प्रतियोगिताको विजेताले पाँच लाख रुपियाँ सहित ट्रफी र उपविजेताले दुई लाख ५० हजार हात पार्नेछन् । हरेक खेलमा म्यान अफ दि म्याच घोषित गरेर पुरस्कृत गरिने र विधागत तर्फका उत्कृष्ट खेलाडीलाई पनि पुरस्कार प्रदान गरिने आयोजकले जनाएको छ । गत वर्ष भएको १५ औँ संस्करणको उपाधि ‘बी’ डिभिजन क्लब प्लानिङ ब्वाइज युनाइटेडले जितेको थियो ।

नेपाली काँग्रेसका नेता सहिद भीमनारायण श्रेष्ठलाई विराटनगरमा राजा वीरेन्द्रलाई बम हानेको आरोपमा पक्राउ गरी २०३५ सालमा तत्कालीन सरकारले गोली हानी हत्या गरेको थियो । उनलाई तत्कालीन सरकारले २०७३ सालमा राष्ट्रिय सहिद घोषणा गरेको थियो । उनकै सम्झनामा २०५५ सालबाट यो प्रतियोगिता सञ्चालन हुदै आएको छ । 

सुरुका दुई वर्ष नियमित रुपमा सञ्चालन भएको थियो । त्यसपछि देशको तत्कालीन असहज परिस्थतिका कारण सञ्चालन हुन नसकेको प्रतियोगिता २०६३ सालपछि वर्षेनि हुँदै आए पनि कोरोना महामारीको कारण तीन वर्ष स्थगित भएको थियो ।

यसैबिच सहिद भीमनारायण श्रेष्ठ प्रतिष्ठानले १५औँ संस्करणको सहिद भीमनारायण गोल्डकप फुटबल प्रतियोगिताको आयव्यय समेत सार्वजनिक गरेको छ । १५औँ संस्करणको प्रतियोगितामा ३३ लाख ८६ हजार चार सय ६६ रुपियाँ खर्च भएकोमा २९ लाख ३६ हजार नौ सय दुई रुपियाँ संकलन भएको छ ।

यस्तै ६ लाख ४४ हजार आठ सय ९८ रुपियाँ संकलन हुने चरणमा रहेको प्रतिष्ठानका अध्यक्ष पुरेन्द्रलाल श्रेष्ठले बताए । उनले दाताबाट कबुल भएको रकम संकलन भएमा एक लाख ९५ हजार तीन सय ३४ रुपियाँ बचत हुने जानकारी पत्रकार सम्मेलनमा दिएका छन् ।

• Dhankutapress