धनकुटा प्रेस अनलाईन खवर सम्वाददाता
धनकुटा/धनकुटामा जारी सहिद भीमनारायण गोल्डकप फुटबल प्रतियोगिताको १६ औँ संस्करणमा विर्तामोड युनाईटेड युथ क्लब फाइनलमा प्रवेश गरेको छ ।
धनकुटाको तल्लो टुँडिखेलमा शुक्रबार भएको दोश्रो सेमिफाइनल खेलमा आयोजक भीमनारयण स्मृति गोल्ड क्लव धनकुटालाई ०–३ गोलको फारकिलो अन्तरले पारजित गर्दै विर्तामोड युनाईटेड युथ क्लब फाइनलमा पुगेको हो । जितसंगै सनिवार हुने भीमनारायण गोल्डकप फुटबल प्रतियोगिताको १६ औँ संस्करणको फाईनल खेल विर्तामोड युनाईटेड युथ क्लब झापा र एपिएफको विभागीय फुटबल टिम विच उपाधीको लागि प्रतिष्पर्धा हुनेछ ।
सेमिफाईनल खेलको पहिलो हाफको ४३ औं मिनेटमा विर्तामोड युथ क्लवका जर्सी नं.५ का अनिस लिम्वूले आयोजक धनकुटा विरुद्ध १ गोल गरेर आफ्नो टिमको लागि अग्रता दिलाएका थिए । पहिलो हाफको ४६ औं मिनेटमा आयोजक टिमका किपर्ड प्रदिप भण्डारीले विर्तामोड युथ क्लवका जर्सी नं.९ का असिम चापागाँई टिम क्याप्टेनलाई डि वक्स भन्दा बाहिर लडाएपछि भण्डारीले रेडकार्ड पाएका थिए ।
त्यसैगरी प्रतियोगिताको दोश्रो हाफको २ मिनेट वित्न नपाउँदै पुनः विर्तामोड युथ क्लवका जर्सी नं.११ का अभिषेक गुरुङ्गले थप १ गोल गरेर आफ्नो टिमलाई २ गोल गरेर अग्रता दिलाएका थिए । दोश्रो हाफको २१ औं मिनेटमा आयोजक टिमका जर्सी नं.४ का सहायक क्याप्टेन पदम भट्टराईले आफ्नै पोलमा आत्मघाती गोल गरेपछि झापा सून्यको विरुद्ध ३ गोलको फराकिलो अन्तरले अग्रता लिएको थियो । प्रतियोगिताको म्यान अफ द म्याच झापाका जर्सी नं.८ का मौसम लिम्वू घोषित भए । उनले नगद ५ हजार ५ रुपैयाँ हात पारे ।
दर्शकको लागि निःशुल्क प्रवेशको व्यवस्था गरिएको प्रतियोगिताको फाईनल खेल विजेताले नगद ५ लाख र उपविजेताले २ लाख ५० हजार रुपैयाँसहित ट्रफि मेडल, कप, प्रमाणपत्र हात पार्नेछन । सबैभन्दा बढी गोल गर्ने, म्यान अफ द म्याच तथा सर्वोत्कृष्ट खेलाडीले पनि नगद हात पार्ने आयोजकले जनाएको छ ।
२०५५ सालमा शुरु प्रतियोगिता केही वर्षको स्थगनपछि २०६३ सालदेखि नियमित सञ्चालन हुँदै आएको छ । तत्कालीन राजा वीरेन्द्र शाहलाई बम प्रहार गरेको आरोपमा २०३५ सालमा मृत्युदण्ड दिइएका सहिद भीमनारायण श्रेष्ठको स्मृतिमा प्रतियोगिता सञ्चालन हुँदै आएको छ । श्रेष्ठलाई सरकारले २०७४ सालमा शहीद घोषणा गरिसकेको छ।
- dhankutapress