धनकुटा प्रेस सम्वाददाता
धनकुटा/पहिरोका कारण ६ दिनदेखि अवरुद्ध रहेको धनकुटा र पाँचथर जोड्ने भेडेटार–रवि–राँके सडक बुधबारदेखि पुनः सञ्चालनमा आएको छ ।
साँगुरीगढी गाउँपालिका–६ नाम्जेको थुम्की नजिक गत शुक्रबार बिहान सुख्खा पहिरो खस्दा सडक पूर्ण रूपमा बन्द भएको थियो । करिब ३५० मिटर क्षेत्रमा सुख्खा पहिरोको कारण थुप्रिएको माटो, ढुंगा र गेगर हटाएपछि बुधबार बिहानदेखि यातायात सञ्चालनमा आएको जिल्ला प्रहरी कार्यालय धनकुटाका प्रमुख शरतकुमार थापा क्षेत्रीले जानकारी दिए । 
सडक निर्माणको जिम्मा लिएको भारतीय कम्पनी एप्को इन्फ्रा टेकले स्काभेटर, जेसीभी लगायत उपकरण परिचालन गरेको थियो भने नेपाल प्रहरीको सहकार्यमा अवरोध हटाइएको साँगुरीगढी गाउँपालिकाका अध्यक्ष जितेन्द्र रुम्दाली राईले जानकारी दिए । उक्त सडकमार्फत धरान र धनकुटाबाट चौबिसे क्षेत्र हुँदै पाँचथरसम्म नियमित यातायात सञ्चालन हुने गर्दछ । सडक खुलेसँगै वुधबार बिहानदेखि सवारीसाधन आफ्नो गन्तव्यसम्म आवतजावत गर्न थालेको जिल्ला प्रहरी कार्यालय धनकुटाले जनाएको छ ।
- dhankutapress
