धनकुटा प्रेस अनलाईन सम्वाददाता 

धनकुटा/दाताहरुको आर्थिक सहयोगमा साँगुरीगढी गाउँपालिका वडा नं. ६ नाम्जेस्थित ग्रामीण जनता माध्यमिक विद्यालयले स्कुल वस खरिद गरेको छ । 

टाढाका विद्यार्थीहरुलाई विद्यालय आउन असहज भएपछि विद्यालयले सहयोग रकम संकलन गरेर स्कुल खरिद गरिएको प्रधानाध्यापक टंक भूजेलले बताए । उनका अनुसार विद्यालयमा पढ्न आउने विद्यार्थीहरुले डेढ देखि दुई घण्टा सम्म हिड्नुपर्ने वाध्यता थियो । वस संचालन भएसँगै विद्यार्थीको हिड्नु पर्ने वाध्यता हटेको उनको भनाई छ । 

वसको भाडा दर सहुलियत राखिएको छ । सवारी चालक र इन्धन खर्चको लागि मात्रै विद्यार्थीसँग सहुलियत दरमा भाडा लिने व्यवस्था गरिएको विद्यालय व्यवस्थापन समितिका अध्यक्ष विष्णुवहादुर आचार्यले बताए । 

एक सय जना दाताहरुले वस खरिदका लागि करिव २७ लाख रुपैया आर्थिक सहयोग गरेका छन् । साँगुरीगढी गाउँपालिका वडा नं. ६ भेडेटार निवासी थामेश्वर सुब्वाले ५ लाख ५५ हजार ५ सय ५५ रुपैया, साँगुरीगढी गाउँपालिकाले ५ लाख रुपैया, धरान–५ सुनसरी निवासी के गुरुङले २ लाख रुपैया सहित विद्यालयका पूर्व विद्यार्थी तथा शिक्षक, विद्यालयमा कार्यरत शिक्षक, अभिभावक, स्थानीय वासिन्दा लगायतले आर्थिक सहयोग गरेका हुन् ।  

होटल स्कूल उद्धघाटन समारोहमा कार्यक्रमका प्रमुख अतिथि साँगुरीगढी गाउँपालिका अध्यक्ष जितेन्द्र रुम्दाली राई स्कूल वसको उद्धघााटन गरे । कार्यक्रममा वोल्दै साँगुरीगढी गाउँपालिका अध्यक्ष जितेन्द्र राईले गाउँपालिकाको आन्तरिक स्रोत कम भएकाले धेरै सहयोग गर्न सक्दैनौं । तर अन्य विद्यालयले पनि दाताहरुबाट स्रोत संकलन गरेको खण्डका गाउँपालिकाको तर्फबाट थोरै भएपनि सहयोग गर्ने प्रतिवद्धता व्यक्त गरे । 

कार्यक्रममा दिइएको जानकारी अनुसार अहिले स्कूल वसले कक्षा १ देखि १२ सम्म अध्ययन गर्ने टाढाका विद्यार्थीहरुलाई सहुलियत शुल्क लिएर सेवा दिइराखेको छ । विद्यालय भन्दा टाढा रहेका माल्वासे, झरना, कार्कीछाप, सुनसरीको देवथानवाट अध्ययन गर्न आउने विद्यार्थीहरुलाई सेवा दिइरहेको छ । विद्यालयमा अहिले ३ सय ३६ जना विद्यार्थी अध्ययनरत छन् । 

• Dhankutapress