धनकुटा प्रेस अनलाईन खबर सम्वाददाता 

धनकुटा/पूर्वमन्त्री तथा प्रतिनिधीसभा सदस्य राजेन्द्रकुमार राईले सरोकारवाला कार्यालयहरुको बार्षिक प्रगती समिक्षा कार्यक्रमले जनतामा गरिबी कम हुने, आम्दानी बढ्ने र सु–शासनको कायम बताएका छन् ।

धनकुटामा जिल्लास्तरीय वार्षिक प्रगति समीक्षा गोष्ठीको बिहीबार उद्धाटन गर्दै पूर्वमन्त्री राईले विगतका बर्षदेखि धनकुटाको जनसंख्या घटेकोले त्यसको समीक्षा हुनुपर्ने बताए । उनले गत आर्थिक वर्षमा धनकुटामा कर्मचारीको लापरवाहीको कारणले केही बजेट फ्रिज भएको बताउँदै आगामी दिनमा यस्तो नगर्न सुझाब दिए ।  उनले जनताको जीवनमा परिवर्तन ल्याउन सकिने कार्यक्रम सञ्चालनमा रहेकोले कुनै पनि तरिकाले लापरवाही नगर्न अनुरोध गरे । सरकारले बक्यौता भुक्तानी नगर्दा धनकुटामा दुध उत्पादन घट्दै गएको उनको भनाइ छ ।

आर्थिक वर्ष २०८०/०८१ मा धनकुटा जिल्लामा सञ्चालित बजेट योजनाको विषयमा सुरु भएको वार्षिक प्रगति समिक्षा कार्यक्रम शुक्रबारसम्म सञ्चालन हुनेछ । कार्यक्रममा धनकुटामा रहेका ७ वटै स्थानीय तह, प्रदेश र संघ सरकार मातहतका विषयगत कार्यालय र विभिन्न गैरसरकारी कार्यालयहरुले गत आर्थिक वर्षमा सञ्चालन गरेका योजनाहरुका समेटिएको प्रगती प्रतिवेदन प्रस्तुत गरिरहेको छन् । 

कार्यक्रममा प्रस्तुत प्रतिवेदननमा कार्यालयहरुले गरेका काम, काम गर्दा देखा परेका समस्या, चुनौती, त्यसलाई सहज बनाउने विषय, बेरुजु समस्या र समाधानको विषयमा छलफल केन्द्रित भईरहेको छ । कार्यक्रममा जिल्लाको पर्यटन, कृषि, शिक्षा, स्वास्थ्य लगायतका क्षेत्रहरुमा भएका उपलब्धि र चुनौतीहरुको समीक्षा भएको छ । कार्यक्रमले जिल्लाको समग्र विकासको अवस्था बुझ्न र आगामी योजनाहरु तय गर्न मद्दत पुग्ने आशा गरिएको जिल्ला समन्वय समिति धनकुटाका प्रमुख निरेन तामाङले जानकारी दिएका छन् । 

• dhankutapress