धनकुटा प्रेस सम्वाददाता
धनकुटा/धनकुटाको महालक्ष्मी नगरपालिका–२ हिलेर्खकका अन्दाजी ३५ वर्षीया ओमबहादुर राना मगर सोही वडाको गौथली भिरमा मृत अवस्थामा फेला परेका छन ।
जटिल भूगोलमा रहेको रानाको शव उद्धारका लागि जिल्ला प्रहरी कार्यालय धनकुटाको अनुरोधमा नं २ बाहिनी अड्डा हिलेको निर्देशनमा धनकुटा स्थित् भीमदल गणबाट नेपाली सेनाको टोली परिचालन गरिएको थियो । 
सेनानी मन्दिप राईको कमान्डमा खटिएको नेपाली सेनाको टोलीले सोमबार दिउँसो करिब १२ः४५ बजेदेखि मृत राना मगरको शव उद्धार कार्य सुरु गरेको थियो । कठिन र जोखिमपूर्ण चट्टा नै चट्टान भएको भूगोलमा रहेको शवलाई भीमदल गणको टोलीले जिल्लास्थित अन्य सुरक्षा निकायहरुसँगको सहकार्यमा दिउँसो करिब ४ः३० बजे सफलतापूर्वक उद्धार गरेको जनाइएको छ ।
उद्धारपछि शव आवश्यक कानुनी प्रक्रिया पूरा गर्न सम्बन्धित निकायलाई जिम्मा लगाइएको छ । घटनाबारे थप अनुसन्धान भइरहेको जिल्ला प्रहरी कार्यालय धनकुटाले जनाएको छ ।
- dhankutapress
