धनकुटा प्रेस सम्वाददाता

धनकुटा/नेकपा एमाले धनकुटाले पार्टीको ११ औं महाधिवेशनका लागि प्रतिनिधि छनोटको प्रकृया अघि बढाएको छ । प्रमुख निर्वाचन अधिकृत नहकुल राईको अध्यक्षतामा बसेको निर्वाचन समितिको बैठकले मंसिर १४ गतेसम्मको निर्वाचन तालिका सार्वजनिक गरेर प्रतिनिधि छनोटको प्रकृया अघि बढाएको हो ।

    कार्यतालिका अनुसार आइतबार मतदाता नामावली प्रकाशन गरिएको एमाले धनकुटाका प्रचार तथा प्रकाशन विभाग प्रमुख रविन कटेलले जानकारी दिए । उनका अनुसार आज साँझ ५ बजेसम्म मतदाता नामावलीमाथि दाबी विरोधको समय निर्धारण गरिएको छ । ९ गते दिउँसो १ बजेसम्ममा अन्तिम मतदाता नामावली प्रकाशन हुनेछ । १० गते बिहान १० देखि दिउँसो २ बजेसम्म उम्मेदवारी मनोनयन दर्ता, सोही दिन दिउँसो २ बजेदेखि ३ बजेसम्म उम्मेदवारको नामावली प्रकाशन र दिउँसो ३ बजेदेखि साँझ ५ बजेसम्म उम्मेदवारको नामावलीमाथि दाबी विरोधको समय तोकिएको छ । ११ गते दिउँसो ४ः५० बजेसम्ममा उम्मेदवारको अन्तिम नामावली प्रकाशन हुनेछ भने १३ गते बिहान ८ बजेदेखि दिउँसो २ बजेसम्म मतदानको समय निर्धारण गरिएको छ । यस्तै १४ गते मतगणना र सोही दिन ४ बजेपछि निर्वाचनको परिणाम घोषणा गर्ने योजना बनाइएको छ । 

    सहमतिबाटै प्रतिनिधि छनोटको प्रयास गरिने र सहमतिबाट टुङ्गिन नसकेमा मतदान प्रकृयाबाट प्रतिनिधि छनौट गरिने एमाले जिल्ला अध्यक्ष शिव आङ्लाले जानकारी दिनुभयो । धनकुटामा एमालेका ८ हजार २ सय ३६ पार्टी सदस्य छन् । जसबाट खुल्लातर्फ ७ जना, महिला ४ जना, ४० वर्षमुनिका युवा १ जना र एक जना दलित गरी महाधिवेशनका लागि १३ जना प्रतिनिधि छनौट हुनेछन् । 

• dhankutapress