धनकुटा प्रेस सम्वाददाता
धनकुटा/प्रतिनिधि सभा सदस्य निर्वाचनको मतदान धनकुटामा शान्तिपूर्ण रुपमा बिहिवार सम्पन्न भएको छ ।
बिहिवार विहान ७ बजेदेखि साँझ ५ बजेसम्म शान्तिपुर्ण रुपमा मतदान भएको थियो । जिल्लाको कुल मतदाता संख्या १ लाख, १८ हजार, ४ सय २५ रहेको छ । जसमध्ये ५४.४५ प्रतिशत अर्थात ६४ हजार, ४ सय ९० मत खसेको धनकुटाका प्रमुख जिल्ला अधिकारी बिनोद कुमार खड्काले बताए । खसेको मतनुसार पुरुष ३२ हजार, १ सय, ५६ र महिला ३२ हजार, ३ सय, ३४ रहेको छ । 
जिल्ला भरिका १६६ वटा मतदान केन्द्रबाट मतगणना स्थल धनकुटा सदरमुकाम स्थित सामुदायिक भवनमा ल्याउने काम भइरहेको प्रजिअ खड्काले बताए । उनका अनुसार वेलुका १० बजे भित्र जिल्लाका सवै पालिकाबाट मतपेटिका आइपुग्नेछ । मतपेटिका आइपुगेपछि सर्वदलीय वैठक गरेर मतगणनाको काम सुरु गरिनेछ । यो पटक मतगणनाको लागि सहजहोस भनेर स्थानीय तह अनुसार मतपेटिका राख्ने व्यवस्था गरिएको छ ।
मतगणना हुने स्थानलाई सिसि क्यामेराले निगरानी गरिएको छ भने गणना स्थल र उम्मेदवारका प्रतिनिधि बस्ने स्थानमा तारघेराबार गरिएको छ । एक मात्र निर्वाचन क्षेत्र रहेको धनकुटामा तीन स्वतन्त्र सहित विभिन्न दलका गरी १७ जना उपचार चुनावी मैदानमा प्रतिस्पर्धामा छन् ।
यसैविच चुनाबी प्रतिष्पर्धामा रहेका उम्मेदवारहरुले आ–आफ्नो पालिकाका गएर त्यहाँ रहेको मतदान केन्द्रमा मतदान गरेका छन् । नेकपा एमालेका उम्ेमदवार राजेन्द्र राईले धनकुटाको पाख्रीवास नगरपालिका वडा नं.७ मुगा स्थित् सरस्वती माध्यामिक विद्यलाय र नेपाली कांग्रेसका उम्मेदवार दिनेश राईले धनकुटा नगरपालिका वडा नं.६ मा रहेको वहुउदेश्यि भवनमा रहेको मतदान केन्द्रमा मतदान गरेका थिए । त्यसैगरी सोही मतदान केन्द्रमा धनकुटा–६ पात्ले खोलाका कृयापुत्री ज्वाला पोख्रेलले पनि मतदान गरेका थिए । 
- dhankutapress
