धनकुटा प्रेस सम्वाददाता

धनकुटा/जिल्ला सदरमुकाम धनकुटा बजारमा उपयोग भईरहेको खानेपानी मुहान क्षेत्रको सरोकारवाला निकाय र उपभोक्ताहरुले प्रत्यक्ष रुपमा स्थलगत रुपमा अनुगमन गरिएको छ । 

पूर्व खानेपानी मन्त्री तथा धनकुटाबाट संघीय संसदमा प्रतिनिधित्व गरिरहेका प्रतिनिधिसभा सदस्य राजेन्द्र कुमार राईको नेतृत्वमा भएको अनुगमनमा मुहान संरक्षण, पानीको स्रोतको अवस्था र दीर्घकालीन व्यवस्थापनका विषयमा समेत वृहत छलफल गरिएको छ ।धनकुटा नगर खानेपानी तथा सरसफाइ उपभोक्ता समितिले धनकुटा बजारमा खानेपानी आपूर्ति गर्ने विभिन्न मुहानको उपभोक्ता सहित प्रत्यक्ष स्थलगत निरीक्षण तथा अनुगमन गरेको हो । पूर्व खानेपानी मन्त्री तथा प्रतिनिधिसभा सदस्य राजेन्द्रकुमार राईको उपस्थितिमा भएको अनुगमनमा छरछरे तीनदोभाने, लुङधाङ खोला, आइतबारे खोला, रानिवन र मुढे मुहानको निरीक्षण गरिएको छ । अनुगमनका क्रममा मुहान क्षेत्रको संरक्षण, पानीको स्रोतको वर्तमान अवस्था, पानीको दिगोपना तथा भविष्यमा खानेपानी आपूर्तिलाई थप प्रभावकारी बनाउने विषयमा अध्ययन गरिएको छ । धनकुटा बजारलाई सहज खानेपानी उपलब्ध गराउने योजनाका साथ अनुगमनमा सहभागी भएको प्रतिनिधीसभा सदस्य राजेन्द्रकुमार राईले बताए ।अनुगमनको मुख्य उद्देश्य बर्खायाममा बजार क्षेत्रमा आउने धमिलो पानीको वास्तविक कारण पहिचान गर्नु, खानेपानीका संरचनाहरुलाई सुरक्षित र प्रभावकारी बनाउने विषयमा अध्ययन गर्नु तथा भविष्यमा आवश्यक स्तरोन्नतिका योजनाका लागि सुझाव संकलन गर्नु रहेको थियो । विशेषगरी धनकुटा बजारका लागि नगरपालिकाको वडा नं. १, २ तथा छथरजोरपाटीको ताङखुवाका क्षेत्रमा खानेपानीका मुहानहरु रहेका छन् । यी क्षेत्रमा बाक्लो बस्ती, खेतीपाती र धेरै ग्रामीण सडकहरु रहेका कारण वर्षायाममा माटो बगेर मुहानमा पुग्ने समस्या रहेको छ । मुहान आसपासका सडक कालोपत्रे भएमा करिब ७० प्रतिशतसम्म पानी धमिलो हुने समस्या घट्ने विश्वास गरिएको छ । जसको लागि सम्बन्धित निकायहरुको ध्यानाकर्षण गराउन सर्वपक्षीय अनुगमन गरिएको खानेपानी उपभोक्ता समितिका सचिब अर्जुन छाराहाङ आठपहपरयाले बताए ।

धनकुटा नगर खानेपानी तथा सरसफाइ उपभोक्ता समितिले धनकुटाको लहरे चौतारमा १ करोड ७ लाखको लगानी फिल्टर ट्यांकी सहितका संरचना निर्माण गरिरहेको छ । धनकुटा नगर खानेपानी तथा सरसफाइ उपभोक्ता समितिमा करिब ३ हजार ८ सय उपभोक्ता आवद्ध रहेका छन् । 

• dhankutapress