धनकुटा प्रेस अनलाईन सम्वाददाता 

काठमाडौं/वाग्मती प्रदेश नाम खारेज गरी ताम्सालिङ प्रदेश निर्माणको लक्ष्यसहित ताम्सालिङ संयुक्त संघर्ष समिति नेपालको घोषणासभा गरिने भएको छ । 

भदौ १० गते धुम्बाराहीस्थित एसआर बैंक्युटमा दिउँसो १ बजेदेखि बृहत् घोषणासभा हुने ताम्सालिङ संयुक्त संघर्ष समिति नेपालका सदस्यसचिव एवं नेपाल तामाङ घेदुङका संघीय अध्यक्ष मोहन गोले तामाङले जानकारी दिए। उनले ताम्सालिङ निर्माणका खातिर जुट्नु हुन सम्पूर्ण अभियन्ताहरुलाई मंगलबार आग्रहसमेत गरेका छन् । संघर्ष समिति घोषणापछि मिसन–२०८४ लाई चुम्न र आफ्नो इतिहास आफैले कोर्ने हिम्मत र साहसका साथ काममा खटिने अध्यक्ष तामाङले घोषणा गरेका छन् । 

यसअघि साउन ३१ गते बसेको बैठकले ताम्सालिङ संयुक्त संघर्ष समिति अवधारणापत्र र आचारसंहिता पारित गरेको थियो । जुन दिन सदस्यसचिव गोलेको प्रतिक्रिया थियो–‘राज्यसत्ताद्वारा प्रवर्द्धन गरिएका सबैखाले जातीय विभेदको विरुद्ध लड्न समयले एउटा क्रान्ति मागिरहेको वर्तमान परिस्थितिमा आज ऐतिहासिक कार्य सप्पन्न भएको छ ।’ लगभग दुई महिना लामो छलफल र बहसपछि ताम्सालिङ संयुक्त संघर्ष समितिको अवधारणापत्र र आचारसंहिता आज पारित गरियो । यसबाट विभिन्न विचार, सिद्धान्त बोकेर हिँडेका तामाङ नेतृत्व र अभियन्ताहरू आजदेखी ताम्सालिङ निर्माणको साझा मुद्दामा एकठाउँमा उभिएका छन् ।

• Dhankutapress