धनुकटा प्रेस अनलाईन खबर सम्वाददाता 

बेलहरा/धनकुटाको बाघखोरमा हेलीप्याड निर्माण भएको छ । धनकुटा नगरपालिका ९ स्थित बेलहाराको बाघखोरमा वडा नं. ९ को कार्यालय, डिएन ग्रुप अफ कम्पनी र स्थानीयको आर्थिक सहयोग तथा नेपाली सेनाको भीमदल गणको प्राविधिक सहयोगमा हेली प्याड निर्माण भएको हो ।

आइतबार हेलिप्याड समुद्घाटन तथा हस्तान्तरण गर्दै नं. २ बाहीनीअड्डा हिलेका बाहिनीपति सहायक रथी रामकाजी थापाले विपदमा परेका, जटिल अवस्थाका गर्भवती÷सुत्केरी महिला तथा गम्भिर खालका बिरामीलाई आकस्मिक उद्धार गर्न सहज होस् भन्ने उद्देश्यका साथ हेली प्याड निर्माण गरिएको बताए । 

सो अवसरमा उनले हेलिप्याड निर्माण सम्पन्न भएपनि सामान खरिद गर्दा अपुग भएको ६० हजार रुपैयाँ आफूले भुक्तान गरि दिने बताए । भीमदल गणबाट १० दिनसम्म पर्खाल लगाई हेलिप्याडको ढलान सहित सम्पूर्ण काम गरेको र हेलिप्याड निर्माणवाट स्थानीय बासिन्दाहरु प्रत्यक्ष रुपमा लाभान्वित हुने विश्वास लिइएको भीमदल गणका गणपति प्रमुख सेनानी सुमन थापाको भनाइ छ । हेली प्याड निर्माण भएपछि प्राकृतिक विपदको समय तथा अन्य आपतविपदमा सहज हुने निर्माण समिति संयोजक मनोज रायमाझिले बताए । 

कार्यक्रममा पूर्व प्रदेशसभा सदस्य कुशुम श्रेष्ठ (जुली), धनकुटाका प्रमुख जिल्ला अधिकारी पुण्यविक्रम पौडेल, धनकुटा नगरपालिका वडा नं. ९ का अध्यक्ष टंक रोइला, धनकुटा जिल्लास्थित सुरक्षा निकायका प्रमुखहरुको सहभागिता रहेको थियो । 

• Dhankutapress