धनकुटा प्रेस अनलाईन सम्वाददाता 

धनकुटा/नेपाली सेनाको भीमदल गण धनकुटाले सञ्चालन भएको सैन्य आधार तालिममा प्रशिक्षणरत ८७ जना सैन्य शिक्षार्थीहरुको दिक्षान्त समारोह सोमवार सम्पन्न भएको छ । 

पूर्वीपृतना हेडक्वार्टर इटहरीका महासेनानी युवधिर मान सिंह अधिकारीको प्रमुख आतिथ्यमा सैन्य आधार दिक्षान्त समारोह सम्पन्न भएको हो । गत मंसिर १ गतेबाट संचालन भएको सि.स. २ सैन्य आधार तालिम ९ महिना पश्चात दीक्षान्त समारोह भएको हो । सैन्य आधार तालिममा प्रशिक्षणरत ८७ जनाले सैन्य आधारभुत तालिम पश्चात सोमबारबाट सिपाही दर्जामा प्रवेश गरेको भीमदल गण धनकुटाका गणपति सुमन थापाले बताएका छन् । 

दिक्षान्त समारोह पश्चात उनीहरु नेपाली सेनामा रहेको विभिन्न युनिट–फर्मेशनको रिक्त रहेको दरबन्दीमा नियुक्ति हुनेछन् । दिक्षान्त समारोहमा पूर्वीपृतना हेडक्वार्टरका महासेनानी युवधिर मान सिंह अधिकारीले तालिमका शिक्षार्थी सैन्यद्वारा प्रदर्शन भएको अन्तिम दलेल कवाजको निरीक्षण गर्दै शिक्षार्थीहरुलाई सैनिक जस्वनको उज्वल भविश्यको लागि शुभकामना व्यक्त गरे । महासेनानी अधिकारीले ९ महिने तालिम अवधिभरमा सर्वोत्कृष्ट सैन्य हुने खोटाङ जिल्ला, साकेला गाउँपालिका–४ घर भएका नईन्द्र राईका छोरा नदिप राईलाई खुकुरी होल्डर घोषित गरी पुरस्कार एवं प्रमाण वितरण गरे । 

करीब ९ महिना अवधीको सैन्य आधार तालिममा शिक्षार्थी सैन्य जवानहरुले सैनिक पेशागत सम्बन्धी सैद्धान्तिक तथा व्यवहारिक ज्ञान हासिल गरेको भीमदल गणका गणपति प्रमुख सेनानी सुमन थापाले जानकारी दिए । 

समारोहमा प्रमुख जिल्ला अधिकारी पून्यविक्रम पौडेल, सहायक प्रमुख जिल्ला अधिकारी अञ्जन न्यौपने, कोष तथा लेखा नियन्त्रक ध्रुर्व कार्की लगायत सरकारी अधिकारीहरुको उपस्थिति रहेको थियो । साथै, दिक्षान्त समारोहमा शिक्षार्थी सैन्यहरुको परिवार, सामाजिक संघ संस्था, उद्योगी व्यपारीहरुका प्रमुख एवं प्रतिनिधिहरुको समेत उपस्थिति रहेको थियो । उक्त दिक्षान्त समारोहमा सैन्य आधार तालम प्राप्त गरेका सैन्यहरुले अन्तिम दलेल कवाजको विभिन्न प्रस्तुती गरेको थिए । 

• Dhankutapress