धनकुटा प्रेस अनलाईन खवर सम्वाददाता 

जनु तामाङ

हिले/धनकुटाको हिलेमा आगामी कार्तिक १४ गते बृहत साँस्कृतिक कार्यक्रम हुने भएको छ । आयोजक हिले व्याडमिन्टन क्लबले पत्रकार सम्मेलनको आयोजना गर्दैैैै सांस्कृतिक कार्यक्रम हुने जानकारी गराएको हो ।

आगामी तीन महिना भित्रमा हुन लागेको तेस्रो राष्ट्रिय खुल्ला व्याडमिन्टन प्रतियोगिताको सहयोगार्थ हिले व्याडमिन्टन क्लबले बृहत सांस्कृतिक कार्यक्रम आयोजना गर्न लागेको हो । सांस्कृतिक कार्यक्रममा राष्ट्रियस्तरका बहुचर्चित कलाकार तथा स्थानीय कलाकारको प्रस्तुति रहने आयोजक हिले व्याडमिन्टन क्लबका अध्यक्ष आशिष तामाङले जानकारी दिए ।

तेस्रो राष्ट्रिय खुल्ला व्याडमिन्टन प्रतियोगिताको लागि करिब २० लाख खर्च हुने अनुमान रहेको र त्यसका लागि सांस्कतिक कार्यक्रमसँगै अन्य सहयोग संकलनको काम भइरहेको क्लबले जनाएको छ । वि. स. २०७३ साल फागुन ३ गते स्थापना भएको हिले व्याडमिन्टन क्लब विभिन्न सामाजिक कामहरु गर्दै आएको अध्यक्ष आशिष तामाङले बताएका छन् । 

क्लबले हिलेमा कर्बड हल निर्माण, हरेक वर्ष विभिन्न अवसरको आयोजनामा रक्तदान, विभिन्न स्थानमा स्वास्थ्य शिविर, हिले बजारमा सडक बत्ती र सिसि क्यामेरा जडान लगायतका काम गरेको जनाएको छ । त्यस्तै क्लबले अशक्त, रोग लागेर स्वस्थ्य उपचारमा समस्या भएका व्याक्तिहरुलाई समेत अर्थिक सहयोग गर्दै आएको बतार्ईएको छ ।

• dhankutapress