धनकुटा प्रेस अनलाईन खबर सम्वाददाता 

धनकुटा/तेह्रथुमको वसन्तपुर देखि तरकारी वोकेर धरान तर्फ आउँदै गरेको महेन्द्र पिकअफ कोशी लोकमार्ग अन्तर्गत धनकुटा हिले सडक खण्डको धनकुटा–६ नाशल चोकमा सोमवार राती दुर्घटना भएको छ ।

प्रदेश १–०२–००२ च ५२८८ नम्वरको महेन्द्र पिकअफ वसन्तपुरबाट तरकारी लिएर सुनसरीको इनरुवा जाँदै गर्दा गाडीको सर्पोट भाँचिएर दुर्घटना भएको ट्राफिक प्रहरी दिपक खड्काले बताए । खड्काले पिकअफ दुर्घटनालाई हेर्दा निक्कै गम्भिर प्रकृतिको देखिएको बताए । स्थानिय दावा शेर्पाको घरको खानेपानीको ट्याङ्गकी अड्याउने स्टेण्डमा नठोकिएको भए सडकबाट १ सय मिटर टाढा दुरीमा तल झर्ने थियो । तर, खानेपानी ट्याङ्गकी सहितको फलामको स्टेण्डमा ठोकिएर थारै गाडी मोडिएर सडकको डिलमा गएर अडिएको ट्राफिक प्रहरीले खड्काले बताएका छन् ।

थोरै सडकको डिल काटेर झरेको भए धनकुटा नगरपालिका वडा नं.६ का वडाध्यक्ष मिलन नेवाःखड्गीको घरको छानामा क्षति पुग्ने निश्चित थियो भने गाडीका मालिक विनोद थापा र चालक रामको ज्यान पनि खतरामा पुग्ने थियो । 

धनकुटाको महालक्ष्मी नगरपालिका वडा नं.३ डाँडागाउँ घर भएका गाडी धनी विनोदले भने–‘दिन पुगेको रहेनछ, थोरै मात्र गाडीले सडक छाडेको भए हामी दुवैजना वाँच्ने थिएनौं, हामीलाई भगवानले बचाए ।’ दुर्घटनाको कारण घट्ना स्थल नजिकै रहेको टशिदेले होटलको खानेपानीको ट्याङ्गकीमा क्षति पुगेको छ । दुर्घटनाको कारण कुनै पनि मानविय क्षति भने हुन पाएन । 

• Dhankutapress