धनकुटा प्रेस सम्वाददाता
आठराई/तेह्रथुम जिल्लाको आठराई गाउँपालिका वडा नं.७ कर्कलेमा मंगलवार दिउँसो जंगलमा लागेको डडेलो फैलिएर गाउँ पस्ता १० घर जलेर नष्ट भएको छ ।
चार दिन अघि सोही वडाको खेपुवा दोभानबाट लागेको आगो ढोडेनी, मार्साङ्गवारी, खाल्डे, खैरेनी, ओडारे, चुचेढुङ्गा, घुमाउने, जोरसाल हुँदै फैलिएर कर्कले गाउँमा पसेको हो । अत्याधिक हावाहुरीको कारण बन डडेलो फैलिएर गाउँमा आगलागी भएको स्थानिय तुलसीराम धमलाले जानकारी दिएका छन् । बन डडेलोको कारण स्थानिय प्रसादसिं तामाङ र खाण्डो लामाको घर जलेर पूर्णरुपमा नष्ट भएका छन् । अन्य ८ घर भने मानब बिहिनहरु जलेका हुन् । 
अन्य मानब बिसोवास नभएको घरहरुमा दलवहादुर घिसिङ तामाङ, देउमान घिसिङ तामाङ, विर्ख बहादुर बल तामाङ, बिर्जुलाल घिसिङ तामाङ, जंगवहादुर स्याङ्गबा तामाङ रहेका छन् । त्यसैगरी सोही वडाका रानीचौतारा र डोप्किलेमा वुद्धिमान सिवा, महानन्द फुयल, कमल प्रसाद बास्तोला, मुक्तिनाथ फुयलको घर पनि जलेर पूर्णरुपमा खरानी भएको छ । यी घरका मान्छे भने केहि वर्ष पहिले नै तराईका विभिन्न जिल्लामा बसाँई सरेर गएका छन् । 
आगलागीको कारण अन्नपात, भाँडा, वर्तन, लत्ताकपडा जलेर नष्ट भएका छन् । आगलागीले टिनको छाना भएको प्रसादसिं तामाङको १ घर र अन्य खरको छाना भएको ९ घर जलेर नष्ट भएको हो । आगलागीको कारण के कति क्षति भयो भन्ने बिबरण आउन सकेको छैन । आठराई गाउँपालिकाले वुधवार (आज) राहात वितरण गर्ने तयारी भैरहेको छ । आजै प्रहरीले आगलागी गर्दा भएको क्षतिको बिबरण लिने तयारी भैरहेको स्थानिय तुलसीराम धमलाले जानकारी दिएका छन् ।
आगलागी पछि खानेपानीको हाहाकार मच्चिएको छ । फाक्चुवा खोलाबाट ल्याएको खानेपानीको पाईप समेत बन डडेलोले जलेर नष्ट भएपछि कर्कले आउने खानेपानी आपुर्ति टुटेको हो । फाक्चुवा खोलाको पानी आपुर्ति नहुँदा तमोर कोया खोलाको पानी बोकेर खान वाध्य हुनु पर्ने स्थिति छ । कर्कलेका बन डडेलो पिडित परिवार राहातको पर्खाइमा रहेका छन् । 
- dhankutapress
