धनकुटा प्रेस अनलाईन खवर सम्वाददाता 

धनकुटा/विगत ६ महिना देखी भुक्तानी नपाएका धनकुटाका दूध उत्पादक किसानहरुले जिल्ला प्रशासन कार्यालयमा सोमवार दुई घण्टा धर्ना दिएका छन् । 

जिल्ला प्रशासन कार्यालय धनकुटाको मूलगेटमा जिल्लाका विभिन्न पालिकाका १ सय ५० भन्दा बढी किसानहरुले सोमबार बिहान १० देखि १२ बजेसम्म दुई घण्टा धर्ना दिएका हुन् । उनीहरुले प्रमुख जिल्ला अधिकारी पुण्यविक्रम पौडेलमार्फत नेपाल सरकारलाई ज्ञापन पत्र समेत पठाएका छन् । दुग्ध किसानहरुको सरकारी स्वामित्वमा रहेको डिडिसी लगायतका अन्य डेरी उद्योगीहरुले विगत ६ महिना अघिदेखि ६ अर्ब भन्दा बढी भुक्तानी बक्यौता रहेको केन्द्रिय दुग्घ सहकारी संघ लि. नेपालका अध्यक्ष अम्बरवहादुर कुँवरको भनाई छ । 

संघले आगामी फागुन १७ गते जिल्ला दुग्ध उत्पादक सहकारीको संघहरुको नेतृत्वमा बिहान १० देखि १२ बजेसम्म दुई घण्टा राजमार्ग तथा सम्भावित सडक मार्गहरुमा शान्तिपूर्ण चक्का जाम र २१ गते देशभरका किसानहरुलाई माइतीघर मण्डलामा भेला गराएर धर्ना तथा विरोधको कार्यक्रम तय गरेको छ ।

धनकुटा जिल्लामा भने विभिन्न पालिका भित्र रहेको २६ वटा सहकारीको विगत ६ महिना देखीको १२ करोड डिडिसीसंग भुक्तानी वाँकी रहेको जिल्ला दुग्ध उत्पादक सहकारी संघका अध्यक्ष नारद कटुवालले बताए । उनले आफूहरुको दुध्को भुक्तानी नभएसम्म कुनै पनि हालतमा आन्दोलन नरोकिने बताए । 

• Dhankutapress