धनकुटा प्रेस अनलाईन खवसर सम्वाददाता 

काठमाडौ/संस्थापक अध्यक्षको विवादले नेपाल पत्रकार महासंघको ‘अग्र अनुहार’ पुस्तक विमोचन समारोह विथोलिएको छ।  आइतबार महासंघको प्रदेश प्रतिष्ठान समितिले ‘अग्र अनुहार’ पुस्तकको विमोचन समारोहको आयोजना गरेको थियो ।

तर, उक्त पुस्तकमा पत्रकार महासंघका संस्थापक अध्यक्ष सत्यनारायण बहादुर श्रेष्ठ नलेखेर कृष्णप्रसाद भट्टराई नै उल्लेख गरी इतिहास बंग्याउन खोजेको भन्दै आदिवासी जनजाति पत्रकार महासंघ (फोनिज) संघीय समितिले विरोध जनाएको हो । फोनिज आबद्ध पत्रकाररूले विमोचन समारोह बिथोल्नुका साथै पुस्तकसमेत च्यात्च्यूत पारिदिएका छन् ।

नेपाल पत्रकार महासंघले वि.सं. २०१२ सालमा नेपाल पत्रकार संघका अध्यक्ष बनेका कृष्णप्रसाद भट्टराईलाई संस्थापक अध्यक्ष मान्दै आएको छ । तर, त्यसअघि २००८ सालमै सत्यनारायण बहादुर श्रेष्ठ अध्यक्ष भएको पुष्टि भइसक्दा पनि भट्टराईलाई नै संस्थापक अध्यक्ष मानिएपछि आफूहरूले विरोध जनाएको आदिवासी जनजाति पत्रकार महासंघ (फोनिज) का महासचिव मिलन लिम्बूले जानकारी दिए ।

उनका अनुसार श्रेष्ठको नेतृत्वमा ९ वैशाख वि.सं. २००८ मा नेपाल पत्रकार संघ गठन भएको थियो । महासंघले इतिहास सच्याउन र संस्थापक अध्यक्ष टुंगो नलागेसम्म कुनै गतिविधि नगर्न यसअघि पनि पटक–पटक ध्यानाकर्षण गराएको लिम्बूले बताए । गलत तथ्यलाई स्थापित गर्ने गलत मनसायका साथ पुस्तक प्रकाशन भएको भन्दै विमोचन रोक्न महासचिव लिम्बूले शनिबार नै प्रेस विज्ञप्ति जारी गरेका थिए ।

• Dhankutapress