धनकुटा प्रेस अनलाईन सम्वाददाता 

धनकुटा/गत माघ ६ गतेदेखि १६ गतेसम्म धनकुटामा सञ्चालन भएको प्रादेशिक औद्योगिक ब्यापार मेला तथा कृषि प्रद्धशनी एभोकाडो एवं धनकुटा महोत्सवको खर्च विहिवार सार्वजनिक गरिएको छ ।

महोत्सवको आयोजक समेत रहेको धनकुटा उद्योग वाणिज्य संघ धनकुटाले पत्रकार सम्मेलन गर्दै महोत्सवको आय व्यय सार्वजनिक गरेको हो । महोत्सवका लागि विभन्न संघ संस्था, प्रायोजक, सहप्रायोजक तथा अन्य सहयोगी सस्थाबाट ५६ लाख २८ हजार ४ सय रुपैया प्राप्त भएको धनकुटा उद्योग वाणिज्य संघ धनकुटाका कोषाध्यक्ष रुपेश श्रेष्ठले जानकारी दिए ।

त्यस्तै गरी महोत्सव सञ्चालनमा ५६ लाख ४ हजार २५ रुपैया खर्च भएको र महोत्सवबाट २४ हजार ३ सय ७५ रुपैया मात्र नाफा भएको पत्रकार सम्मेलनमा जानकारी दिइएको छ । महोत्सव सञ्चालनको क्रममा माघ १४ गते अत्याधिक दर्शकहरुको भिडका कारण दुःखद  घटनामा परि ३१ जना घाईते भएका थिए । घाईतेको उपचारको लागि ५ लाख, २५ हजार, २ सय, ९६ रुपयाँ  खर्च भएको वताइएको छ ।

त्यसका साथै विविध कारणले गर्दा महोत्सवले भने जस्तो नाफा कमाउन नसकेको आयोजकले जनाएको छ । स्थानीय उत्पादन तथा लोक सँस्कृतीलाई प्रोत्साहन दिने र पर्यटन प्रबद्र्धन गरि धनकुटाको विकास समृद्धिको लागि सहयोग गर्ने लक्ष्य राखि महोत्सव आयोजना गरिएको उद्योग वाणिज्य संघ धनकुटाका अध्यक्ष विजयसन्तोषी राईले जानकारी दिए । १० दिन सम्म सञ्चालन भएको महोत्सवमा १ लाख ५० हजार व्यक्तिले अवलोकन गरेको उद्योग वाणिज्य संघ धनकुटाका बरिष्ठ उपाध्यक्ष तथा कार्यक्रम संयोजक मनकुमारी तितुङ्ग (तारा) ले जानकारी दिईन । महोत्सवमा स्थानीय कलाकार, स्थानीय जातजातीका झाँकी तथा स्थानीय उत्पादन तथा परिकारको प्रबद्धन भएको सचिव श्रीराम रायमाझीले जानकारी दिएका छन् ।

• Dhankutapress