धनकुटा प्रेस अनलाईन खबर सम्वाददाता 

धनकुटा/जाजरकोट र रुकुम पश्चिमका भूकम्प पीडितलाई सहयोगका लागि धनकुटाबाट १ लाख ४२ हजार रकम संकलन गरिएको छ । धनकुटा उद्योग वाणिज्य संघ, वितरक संघ र होटल एशोसिएसनले राहत संकलन अभियान चलाएर पैसा उठाएका हुन् ।

       तीन वटै संस्थाले आज धनकुटामा पत्रकार सम्मेलन गरेर पहिलो चरणमा १ लाख ४२ हजार १ सय ४० रुपैयाँ रकम संकलन भएको जानकारी दिएका छन् । सोमबार हिले बजार र मंगलबार धनकुटा बजारमा सहयोग संकलन अभियान चलाइएको थियो । अभियानका क्रममा धनकुटा बजारबाट ८० हजार ३५ रुपैयाँ र हिले बजारबाट ६२ हजार १ सय ५ रुपैयाँ रकम संकलन भएको छ । अब धनकुटाका अन्य बजारहरुबाट पनि सहयोग संकलन गरेर सरकारको उद्धार तथा राहत कोषमा रकम जम्मा गरिने उद्योग बाणिज्य संघका अध्यक्ष विजयसन्तोषी राईले जानकारी दिए ।

पत्रकार सम्मेलनमा उद्योग बाणिज्य संघका अध्यक्ष राई, बरिष्ठ उपाध्यक्ष तारा तितुङ, सचिव श्रीराम रायमाझी, पूर्व अध्यक्ष लालचन्द गोङ्वा र होटल एशोसिएसनका उपाध्यक्ष डम्बरबहादुर काफ्लेले दुखमा परेकाहरुलाई सहयोग पुर्याउँन रकम संकलन गरिएको भन्दै संकलित रकम एक रुपैयाँ पनि खर्च नगरी पीडितहरुका लागि पठाइने जानकारी दिए । पत्रकार महासंघका अध्यक्ष नगेन्द्र राईले सहयोग संकलन गरेर मानवीय धर्म निर्वाह गरेको भन्दै अभियानमा खटिनेहरुलाई धन्यवाद ज्ञापन गरे ।

• Dhankutapress