धनकुटा प्रेस सम्वाददाता 

मोरङ/कोदोको रक्सीलाई ब्राण्डिङ गर्न आर्जनसँग जोड्नका लागि अग्रसर परम्परागत मदिरा (कोदोको रक्सी) प्रवद्र्धन समिति प्रदेश नं. १ को विभिन्न जिल्लामा संगठन विस्तार गर्दै आएको छ ।

यसैक्रममा प्रदेश नं. १ का १४ वटै जिल्लामा समिति विस्तार गर्ने योजना अनुरुप मोरङमा पनि आइतवार कोदोको रक्सी प्रवद्र्धन समिति मोरङ गठन गरिएको हो ।

परम्परागत मदिरा (कोदोको रक्सी) प्रवद्र्धन समिति मोरङको प्रथम जिल्ला भेलाले शान्ता मोक्तान तामाङलाई संयोजकमा चयन गरेको छ । प्रवद्र्धन समितिको सदस्यहरुमा रुकमणि धिमाल, भक्तशेर लिम्बू, कमल गुरुङ, फुलसरा तामाङ, विन्दुकला गुरुङ, कृष्ण मेन्याङ्बो, राधा लिम्बू, सीता राई, दिलमाया गुरुङ, अनिता तामाङ, दिलबहादुर तामाङ, कल्पना राई, राधा लिम्बू र ज्ञानु श्रेष्ठ रहेका छन् ।

समिति गठनका लागि आयोजित भेलामा कोदोको रक्सीका सम्भावना र चुनौतिका विषयमा छलफल गरिएको थियो । छलफलमा बुद्धिजीवि देसु वनेम, टेक खजुम, दिलकुमार नेम्वाङ, सरु सिङ्घक लगायतले कोदोको रक्सीलाई ब्राण्डिङ गरेर अन्तर्राष्ट्रियकरण गर्न सके आम्दानीको राम्रो स्रोत बन्न सक्ने बताए ।

कार्यक्रममा आदिवासी जनजाति महासंघ मोरङका उपाध्यक्ष कमल गुरुङ, किरात राई यायोक्खा उपाध्यक्ष सीता राई, पूर्व जनप्रतिनिधि विन्दु गुरुङ, किरात याक्थुङ चुम्लुङ सचिव कृष्ण मेन्याङ्बो, केशव थापा मगर लगायतले कोदोको रक्सी र यसका सम्भावनाका विषयमा आ–आफ्नो विचार राखेका थिए ।

कार्यक्रममा प्रवद्र्धन समितिले कोदो रक्सी निर्माणका लागि चाहिने कोदो, मर्चाका लागि चाहिने जंगली जडिबुटी लगायतको संरक्षणमा सरकारले चासो देखाउनु पर्नेमा पनि जोड दिएको छ । कार्यक्रममा प्रदेश नं.१ मा कोदो हुने क्षेत्रको पहिचान गर्दै रक्सी उत्पादनमा चाहिने कोदोका लागि एकीकृत कोदो खेति कार्यक्रम लागु गरेर कोदो उत्पादनमा जोड दिनुपर्ने माग गरेका छन् ।

• Dhankutapress