धनकुटा प्रेस सम्वाददाता 

धनकुटा/जिल्ला सदरमुकाम धनकुटामा रहेको ऐतिहासिक निशान भगवती मन्दिरमा दुई सय वर्ष पुरानो ढुंगेधाराको पुनस्र्थापना तथा समुद्धघाटन गरिएको छ। 

वसन्तपञ्चमीको अवसर पारेर एक समारोहका बीच नेपाली सेनाका पूर्वी  पृतनापति उपरथी सहदेव खड्काले समुद्धघाटन गरेका हुन् । तत्कालीन करिव २ सय ४७ वर्ष पहिले स्थापना गरिएको निशान भगवतीको मन्दिर परिसरको भित्री भागमा रहेको तीनवटा पल्टनका लागि पनि छुट्टाछुट्टै ढुंगेधारा पनि स्थापना गरिएको छ ।

सो अवसरमा निशान भगवती मिन्दरका संरक्षक पुर्वि पृतना हेड क्वाटरका पृ्रतना पति उपरथी खड्काले १८ औं शताव्दीको इतिहाँसलाई पुर्नजिवित गर्ने लक्ष्यका साथ पुरातात्विक शैलीको मन्दिरको मुख्य प्रवेशद्धार र २ वटा तोपको समेत समुद्धघाटन गरेका थिए ।  

मन्दिरमा निर्माण गरिएको तीनवटा पुरानो शैलीका ढुङ्गेधारा मन्दिरको मुलगेटभन्दा भित्र रहेका छन् । मुख्य गरेर मन्दिरमा रहेको जंगी निशान गण, श्रीजंग गण र इन्द्रध्वज गणको निशानको नाममा छुट्टाछुट्टै ढुङ्गेधारा निर्माण गरिएको मन्दिर व्यवस्थापन समितिका महासचिव जनार्दन घिमिरेले बताए । 

धारा वि.सं. २०५२ सालमा धनकुटा हिले लोकमार्ग निर्माण गर्ने क्रममा धनुकटाको जिरोप्वाइन्टमा रहेको ओडार भेटिएको थियो । उक्त ओडारभित्र अहिले निशान मन्दिरमा स्थापना गरिएको ढुंगे धारा भेटिएको हो । धारा संरक्षण र सुरक्षाको कारणले तत्कालीन समयमा प्रदेश संग्राहलय धनकुटामा राखिएको थियो ।  धारा सर्वसाधरणका लागि निशान मन्दिरको बाहिरी भागमा खुल्ला राखिएको छ । ढुंगेधारा तथा प्रवेशद्वार गेटमा तेलिया ईंटाको प्रयोग गरिएको छ। 

२ नम्बर वाहिनीपति सहायक रथी महेशकुमार थापाको संयोजकत्वमा तथा श्री भीमदल गणका गणपति प्रमुख सेनानी सुमन थापा एवं गणका सकल दर्जाका अधिकृतहरुको अथक प्रयास र निशान भगवती मन्दिर व्यवस्थापन समितिको सक्रियतामा उक्त ढुङ्गेधारा निमार्ण कार्य सम्पन्न भएको थियो ।

समुद्धघाटन समारोहमा धनकुटा नगरपालिकाका उपमेयर भीमा खनाल, श्री नं.२ वाहिनी पति सहायक रथी महेश कुमार थापा, जिल्ला प्रशासन कार्यालयका निमिक्त प्रमुख जिल्ला अधिकारी ममता अधिकारी, भमिदल गणका निमिक्ति गणपति सेनानी पूर्ण प्रजापती ,जिल्ला प्रहरी कार्यालय धनकुटाका प्रमुख लक्ष्मीराज अधिकारी लगायत विभिन्न सरकारी कार्यालय, सामाजिक संघ–संस्थाका प्रमुख एवं प्रतिनिधिहरुको उपस्थिति रहेको थियो । 

निशानमा हाल पुननिर्माण एवं पुनस्र्थापन गरिएको पुरातात्विक शैलीको प्रवेशद्धार, ढुङ्गेधारा, र तोप २ थानले धनकुटा जिल्लाको धार्मिक महत्व वढ्ने र धार्मिक पर्यटनमा टेवा पुग्ने विश्वास गरिएको छ । नेपाली सेनाको क्यूआइपी कार्यक्रम अन्तर्गत निर्माण गरिएको ढुङ्गेधारा, प्रवेशद्धार र २ थान तोप १५ लाख, ५९ हजार, १ सय ५ रुपयाँको लागतमा सम्पन्न भएको भीमदल गण धनकुटाका निमिक्त गणपति सेनानी पूण प्रजापतीले वताए ।  

• Dhankutapress