धनकुटा प्रेस सम्वाददाता 

काठमाडौं/राष्ट्रिय संगीतकर्मी संघ रसुवाको आयोजनामा दिवंगत बरिष्ठ कलाकार जयनन्द लामा अभिनित चलचित्र ‘अभियान’ काठमाडौं जमलस्थित राष्ट्रिय नाचघरमा प्रिमियर गर्ने भएको छ ।

कोशी भिजन फिल्मस इटहरी सुनसरीको ब्यानरमा तयार पारिएको तामाङ ऐतिहासिक कथानक तथा नेपाली भाषाको चलचित्र अभियानलाई यहीँ आउदो असोज १० गते प्रिमियर शो गर्ने तयारी गरेको हो ।

लाखमान योन्जन तामाङको कथा तथा निर्देशनमा निर्माण, मैना घिसिङ निर्माता रहेको उक्त चलचित्रमा दिवंगत कलाकार जयनन्द लामाको साथमा दावा फिन्जो तामाङ, अमर पाख्रिन, श्याम माया तामाङ, रस्मिला वाइबा तामाङ, पुजा मोक्तान तामाङ, गजमसिंह घिसिङ तामाङ लगायत दर्जनौं कलाकारहरुको बेजोड अभिनय रहेको छ ।

विशेषगरी नेपालको सन्दर्भमा विभिन्न जातिय सभ्यता र पहिचानको कथा बोकेको चलचित्र कम बने पनि विश्वमा विशेषगरी ऐतिहासिक चलचित्रहरु बढी निर्माण भएको र त्यस्ता ऐतिहासिक चलचित्र व्यावसायिक रुपमा पनि सफल भएको सन्दर्भमा विशेष गरेर तामाङ समुदायको अधिकारको विषयवस्तु कथा बनेको ‘अभियान’ चलचित्रलाई पनि दर्शकहरुले मन पराउनेमा निर्माण पक्ष ढुक्क छन् ।

कोभिड महामारीका कारण थलिएको चलचित्र उद्योगलाई उठाउन विभिन्न विदेशी चलचित्रलाई डबिङ गरेर हलवालाहरुले करोडौं लगानीमा जोखिम मोलिरहेको अवस्थामा ‘अभियान’ चलचित्रले व्यावसायिक फड्को के कति मार्लान त्यो भने हेर्न बाँकी नै रहेको सरोकारवालाहरु बताउँछन् ।

नेपाल एकिरकणको क्रममा आफ्नो अस्तित्व गुमाउनु पुगेका तामाङहरुको अन्तिम राजा ह्रेन्जेन दोर्जेको इतिहास र तामाङहरुको ऐतिहासिक थाकथलो “किपट’ को कथामा आधारित चलचित्र भएकोले सबै जनाले मन पराउने उक्त चलचित्रका नायक दावा फिन्जो तामाङले बताए ।

साथै, उनले इटहरी, तरहरा लगायतका शहरहरुमा प्रिमियर हुदा दर्शकहरुले माया गरेकाले अब काठमाडौं वरिपरीको जिल्लाहरु हुँदै विशेष गरेर धनकुटा लगायत पुर्वको विभिन्न अन्य शहरहरुमा पनि विशेष गरि च्यारिटि शो गर्दै केही समयपछि चलचित्र ‘अभियान’ देशभर प्रदर्शन गर्ने तयारी रहेको फिल्मका निर्देशक लाखमान योन्जन तामाङले जानकारी दिएका छन् ।

• Dhankutapress