पञ्चमाया तामाङ

धनकुटा/मनसुनको याम सुरु भएसँगै विपद्का घटना घट्ने सम्भावना भएकाले रोकथामका लागि धनकुटामा पूर्व अभ्यास गरिएको छ ।

धनकुटा नगरपालिका वडा नं. ९ मुलघाटस्थित विश्रान्ति मन्दिर नजिक तमोर नदिमा विपद्बाट (बच्न) वा जोगिनका लागि पूर्वतयारीको व्यवहारिक अभ्यास गरिएको हो । तिनै तहका सुरक्षाकर्मीले बाढीपहिरोमा परेकालाई उद्धार गर्ने, भिरबाट लड्दा उद्धार गर्नेदेखि सवारी दुर्घटना भएर मानिस नदिमा खस्दा उद्धार गर्ने तरिका अभ्यासको रुपमा प्रदर्शन गरिएको धनकुटा जिल्लाका प्रमुख जिल्ला अधिकारी पुण्यबिक्रम पौडेलले बताए । 

जिल्ला प्रशासन कार्यालय धनकुटाको संयोजनमा नेपाली सेना, नेपाल प्रहरी र  सशस्त्र प्रहरी बलले संयुक्त रुपमा तमोर नदी र आसपासको घरमा व्यवहारिक अभ्यास गरेका हुन् । जिल्ला सुरक्षा समितिका प्रमुख तथा प्रमुख जिल्ला अधिकारी पौडेलले विपद्, प्रकोपका घटना हुन नदिन र भइहालेमा कसरी जोगिने भन्ने बारे व्यवहारिक अभ्यास गरेर सिकाइएको बताए । सुरक्षाकर्मीले आगलागीमा फसेकालाई उद्धार गर्ने देखी नदीमा बगेको वस्तुलाई डोरी लगाएर बाहिर निकालेको र घाइतेलाई नदीबाट पार गरेको बारेमा व्यवहारिक अभ्यास गरिएको थियो ।

• dhankutapress