धनकुटा प्रेस अनलाईन सम्वाददाता
धनकुटा/चौबिसे गाउँपालिका धनकुटाले बिभिन्न संस्थाहको सहयोगमा आफ्ना ७५ जना स्थायिन जेष्ठ नागरिकको निःशुल्क आँखाको अप्रेसन गरिदिएको छ ।
गाउँपालिकाले गएको चैत १० गतेबाट एक हप्ता सम्म विभिन्न वडामा सञ्चालन गरेको आँखा शिबिरबाट छनौट भएका एक सय ७२ मध्ये ७५ जनाको आँखा अप्रेसन गरिएको हो । नेपाल नेत्रज्वती संघ डा.रामप्रसाद पोखरेल आँखा अस्पताल धनकुटाको प्राबिधिक सहयोग, नेत्रज्वती संघ र सेभा फाउण्डेसनको सहयोग तथा चौविसे गाउँपालिकाको स्थानिय ब्यबस्थापनमा उनीहरुको आँखा अप्रेसन गरिएको हो ।
गाउँपालिकाले एक हप्ते शिविरमा थप यहि चैत्र १८ र १९ गते शिविर सञ्चालन गरेर मोतीबिन्दु र आँखामा मासु पलाएका बिरामीहरुको अप्रेसन गरिदिएको हो । उनीको किर्तिपुर आँखा अस्पताल काठमाण्डौका डाक्टर एरिक बैद्य सहितको सात जनाको टालीले उपचार गरेको आँखा अस्पताल धनकुटाका डाक्टर समिर चापागाईले जानकारी दिए ।
अन्य बिरामीहरु भने प्रतिकुल मौसम र केहि अनियन्त्रित रक्तचापका कारण अप्रेसन हुन नसकेको चापागाईले जानकारी दिए । मौसम खराब भएको कारण पहिचान भएका सबै बिरामीहरु उपचारमा आई नपुगेको चौविसे गाउँपालिका अध्यक्ष राजकुमार लिम्बूले जानकारी दिए ।
‘अप्रेसन राम्रो हुन्न भन्ने गाउँमा गलत हल्लाहरु फैलाईएकोले सबैजना नआएको बुझिएको छ ।’ लिम्बुले भने ‘ वडा तहमा बाँकी रहेकाहरुको उपचारका लागि कार्यपालिकाको बैठक बसेर थप निर्णय गर्नेछौ ।’ अप्रेसन गर्नका लागि गाउँ–गाउँबाट आएका बिरामीहरुको बस्नेखाने लगाएतका बन्दोबस्ती गाउँपाालिकाले गरेको थियो ।
गाउँपालिकामा नै आँखा जाँच केन्द्र सञ्चालन भएको शिविरबाट विशेष गरेर स्थानिय जेष्ठ नागरिकहरु जो आर्थिक रुपमा विपन्न थिए, उनीहरु लाभान्बित भएको अध्यक्ष लिम्बूले जानकारी दिए ।
आफ्ना ७२ बर्षिया बुवा र ६८ बर्षिया फूपुको आँखा अप्रेसन गर्न गाउँपािलका आईपुगेका चौविसे वडा नं. ३ का नेत्र बरालले यस शिविरले आफ्नो ५० हजार भन्दा बढी आर्थिक भारबाट मुक्त भएको जानकारी दिए ।
- Dhnakutapress
