धनकुटा प्रेस अनलाईन सम्वाददाता 

धनकुटा/किराँत साम्पाङ राई जुम्लेखा नेपालको पाँचौं राष्ट्रिय महाधिवेशन धनकुटाको मूलघाटमा सनिवार सम्पन्न भएको छ । 

पुर्व सामाजिक विकास मन्त्री राजन राईको प्रमुख आतिथ्यमा सम्पन्न किराँत साम्पाङ राई जुम्लेखाको पाँचौं राष्ट्रिय महाधिवेशनले वीरकाजी सम्पाङ राईलाई केन्द्रिय अध्यक्षमा सर्वसम्मत चयन गरेको छ । 

किराँत सम्पाङ राई जुम्लेखा नेपाल जिल्ला तदर्थ समिति धनकुटाको स्थानिय व्यवस्थापनमा सम्पन्न पाँचौ राष्ट्रिय महाधिवेशनको वन्द सत्रले जुम्लेखा नेपालको उपाध्यक्षमा तिन जनालाई चयन गरेको छ । नवनिर्वाचित उपाध्यक्षहरुमा पिके खम्वू, बलवहादुर साम्पाङ राई र कृष्णराज राई रहेका छन् । 

त्यसैगरी महासचिवमा चक्रभूवन राई, उप–महासचिवमा मुगाधन राई र यानुकला राईलाई चयन गरिएको छ । त्यसैगरी कोषाध्यक्षमा खड्ग वहादुर राई र सह–कोषाध्यक्षमा पवन राईलाई सर्वसम्मत चयन गरिएको नवनिर्वाचित अध्यक्ष वीरकाजी साम्पाङ राईले ब्लाष्टलाई जानकारी दिए । उनले नवनिर्वाचित समितिको पहिलो वैठक तत्कालै वसेर नेपालभर छरिएर रहेका किराँत साम्पाङ राइ जुम्लेखाहरुलाई भूगौलिक अवस्थिति मिलाउँदै समितिको सदस्यमा चयन गरेर पूर्णता दिने बताएका छन् ।

निवर्तमान केन्द्रिय अध्यक्ष हरि के सम्पाङ राईको अध्यक्षतामा सम्पन्न किराँत साम्पाङ राई जुम्लेखा नेपालको पाँचौं राष्ट्रिय महाधिवेशनको उद्धघाटन सत्रमा पूर्व संविधानसभा सदस्य राजकुमार राई, किराँत राई यायोखाका केन्द्रिय उपमहासचिव अर्जुन जम्नेली राई, जुम्लेखाका सल्लाहकारहरु पुर्व केन्द्रिय अध्यक्षद्धय हिकासरी राई, डि.वि.साम्पाङ राई, वीरकाजी राई, भलाकाजि राई, डा.भक्त साम्पाङ राई लगायतको उपस्थिति रहेको थियो ।  

• Dhankutapress