धनकुटा प्रेस अनलाइन सम्वाददाता 

धनकुटा/वर्तमान सरकारले राष्ट्रघाती काम गरेको भन्दै नेकपा एमाले जिल्ला कमिटि धनकुटाको जनसंगठन समन्वय संयन्त्रले शुक्रवार  धनकुटा बजारमा विरोध प्रदर्शन गरेको छ । 

उनीहरुले विभिन्न प्लेकार्ड सहित नारावाजी गर्दै धनकुटा बजारको विभिन्न भागको परिक्रमा गर्दै अखण्ड भारतको नक्साको विषयमा वर्तमान सरकार निरिह र लाचारी भएको भन्दै विरोध प्रदर्शन गरेका हुन् । उनीहरुले वर्तमान सरकारले चालेको अनेकौं राष्ट्रघाती कदमको विरोध गरेका छन् ।

वजार परिक्रमा गर्ने क्रममा मदनचोकमा आयोजित कोणसभालाई नेकपा एमालेका नेता एवं जनसंगठन प्रमुख शिव आङ्गलाले सम्वोधन गर्दै वर्तमान सरकारले चालेको राष्ट्रघाती कदमको भण्डाफोर गर्न विरोध प्रदर्शन आयोजना गरिएको स्पष्ट गरे । उनले भने–‘वर्तमान सरकारले रेशम चौधरीलाई दिइएको आम माफीले दण्डहिनता वढेको र कानूनी राज्यको उपहास भएको छ ।’ 

उनले विरोध प्रदर्शन राष्ट्रघाती नागरिक विधेयक प्रमाणिकरण विरुद्ध आम नागरिकलाई थाहा दिनको लागि विरोध प्रदर्शन आयोजना गरिएको थप स्पष्ट पारे । उनले भूटानी शुरणार्थी प्रकरणका भ्रष्टचारीहरुलाई कडा भन्दा कडा कार्वाही गर्नुपर्नेमा जोड दिए । वजारपरिक्रमा पछि धनकुटा–६ भीमनारयण चोकमा आयोजित कोणसभालाई राष्ट्रिय युवा संघ नेपाल धनकुटाका अध्यक्ष प्रविण पोख्रेलले सम्वोधन गरेका थिए । 

विरोध प्रदर्शनमा नेकपा एमालेका जिल्ला अध्यक्ष इन्द्रमणी पराजुली, प्रचार विभाग प्रमुख सावित्रा राई, सचिवालय सदस्य नैन विश्वकमर्मा लगायत नेता कार्यकर्ताहरुको उपस्थिति रहेको थियो । 

• Dhankutapreess