सुस्मिता थिङ तामाङ
धनकुटा प्रेस सम्वाददाता
धनकुटा/नेपाल पत्रकार महासँघको ६७ औ स्थापना दिवसको अवसरमा धनकुटाका दुईजना सञ्चारकर्मीहरुले नेपाल पत्रकार महासंघ जिल्ला शाखा धनकुटाद्धारा स्थापित पत्रकार कल्याणकारी कोषमा आर्थिक सहयोग प्रदान गरेका छन् ।
नेपाल पत्रकार महासंघ जिल्ला शाखा धनकुटाका उपाध्यक्ष एवं रेडियो नेपाल धनकुटामा व्यापार अधिकृत पदमा कार्यरत देवकला कार्की र शाखाका प्रदेश पार्षद एवं कान्तिपुर दैनिकका उपसम्पादक रमेशचन्द्र अधिकारीले जनही दश हजार पाँच सय पच्पन्न रुपैया आर्थिक सहयोग प्रदान गरेका हुन् ।
स्थापना दिवसको अवसरमा आयोजित कार्यक्रममा दाता देवकला कार्कीले पत्रकारहरुको कल्याणका लागि सहयोग पुगोस भन्ने उदेश्यले सहयोग रकम प्रदान गरेको प्रतिक्रिया दिए । यसैगरि अर्का दाता एवं धनकुटाका अग्रज पत्रकार अधिकारीले पत्रकार कल्याणकारी कोष मार्फत सवै पत्रकारलाई सेवा पुग्न सकोस र थप अरुवाट पनि सहयोग रकम आउन सकोस भन्ने उद्येश्यले कोषमा आर्थिक सहयोग गरेको बताए ।
पत्रकार महासंघ धनकुटाले स्थापना दिवसको अवसरमा धनकुटा वजारको भीमनारायण चौकवाट मदन चौकसम्म प्रभातफेरी सम्पन्न गरेको थियो । प्रभातफेरी पश्चात जिल्ला अस्पताल धनकुटा र धनकुटा मोडेल अस्पतालका विरामीहरुलाई फलफुल वितरण गरेको थियो । त्यसैगरी शाखाका अ्रध्यक्ष नगेन्द्र राईको अध्यक्षतामा सम्पन्न समापन कार्यक्रममा महासंघका केन्द्रीय सदस्य सरिता वराईली राई, प्रदेश उपाध्यक्ष हिमा चेम्जोङ, फोनिज प्रदेश नं.१ का अध्यक्ष सन्तवीर लामा लगायतकाले मन्तव्य राखेका थिए ।
- dhankutapress
